منزل عائلة الدقاق
إعداد وتصوير طارق بكري

منذ إطلاق مشروع "كنا وما زلنا" التوثيقي قبل ٥ سنوات تقريباً، تم جمع عشرات القصص

من اللاجئين الفلسطينيين حول العالم وتوثيق منازلهم واصطحابهم إليها. كان منها المفرح وآخر مبكي، لكن وبدون شك كان لقصة منزل عائلة الدقاق المبني سنة ١٨٩٠ تقريباً في حي البقعة الفوقا بالقدس المحتلة الأثر الأكبر بل الصدمة والذهول.

 

القصة بدأت من الكويت قبل عدة شهور بعد استضافة كريمة من لجنة "كويتيون لأجل القدس"، فبعد الانتهاء من المحاضرة التي ألقيتها لمجموعة  كبيرة من الكويتيين والفلسطينيين المقيمين في الكويت، توجه لي رجلٌ فلسطيني أمريكي..

-         كيفك يا ابن البلاد انا اسمي ناصر الدقاق..

ـ دقاق القدس صح؟

ـ المناضل ابراهيم الدقاق شو بقربلك؟

ـ الك قرايب بوادي الجوز؟

ـ طيب المحلات اللي على باب القيامة؟

بعد جولة التعارف خبرني ناصر أن جدّه شكيب الدقاق له منزل بالبقعة وعنده صورة قديمة للبيت بس مش عارف وينه وشو صار فيه.

حكيتله بسيطة، ابعثلي صورة البيت وان شالله بس تيجي عالقدس بنروح نفتش عليه!

بالفعل اجا ناصر وأولاده خالد وياسمين عالقدس، الصورة القديمة كانت معي قبل بوقت وكنت شاكك بكذا موقع بس قلت ما بدي احسم وين البيت.. خلينا نطلع ونفتش عليه سوا.

التقينا بمكان قريب من باب العمود وتوجهنا لغرب المدينة، وصلنا سكة حديد القدس – يافا، مشينا بين البيوت العربية المسروقة وكالعادة أنا ما سكتت وعملت درس تاريخ مدعوم بالصور.

وأخيراً لقينا البيت، شارع فرعي مظلل بالشجر، مبنى ضخم من  ٣ طوابق، حديقة جميلة جداً وفيها شجر عمره أكثر من ١٠٠ سنة.

سعادة غامرة على وجوه ناصر وخالد وياسمين وبعربي مكسّر كانوا يحكوا لأبوهم "نيال سيدي اللي كان عايش بهالبيت، والله في بيوت بالقدس أحلى من أميركا".

لحد هون الأمور كانت مألوفة بالنسبة إلي خاصة ردات الفعل بعد ما ألاقي البيوت والتقاط صورة "قبل وبعد" ..

 

بعد دقائق ظهرت لنا عائلة بطريقهم لمدخل البيت، حاملين أغراض وصناديق وعلى وجوهم ابتسامة عريضة ترحيبية.

· شلوم

- أهلاً أنا اسمي طارق

· تشرفنا

- حضرتك ساكن بالبيت ؟

·  شوف الصدفة أنا اشتريت جزء من البيت واليوم أول يوم راح أسكن وأنام فيه مين حضرتكم؟

- بعرفك على ناصر الدقاق، صاحب البيت!

 

صمت رهيب لمدة نص دقيقة ومفاجأة من العيار الثقيل..

بصراحة حسيت الوقت وقف .. شوي اتطلع على ناصر وبعدها عليه..

-         كيف هيك مش فاهم في مجال نحكي ..

- شايف هالصورة القديمة ؟ هون انولد واتربى والده لناصر وبنكبة فلسطين تهجروا من البيت.

 

صدقاً الموقف اللي انحطت فيه العائلة اليهودية لا تحسد عليه، بالرغم من كونهم لطيفين جداً ويساريين جداً وهمروا دموع جداً .. يعني بعد أشهر من البحث على منزل مناسب بالقدس ودفع مبلغ طائل جداً مقابله ولسا جاي حامل عفشك عم بتحطه بالبيت عشان تنام فيه ليلتك الأولى .. يطلعولك صحابه!

التصويت

أضف تعليق

شروط التعليق

"فلسطين الشباب" تنظر لتعليقاتكم وآرائكم بكل أهمية، وتعتبرها إغناء لموقعنا، ولذلك نتمنى التقيد بشروط التعليق:

- أن يكون التعليق ذا علاقة مباشرة بمضمون المادة الكتابية أو البصرية.
- أن يطرح التعليق رأياً من شأنه أن يفتح باباً للنقاش.
- التقيد بالآداب العامة بأن لا يحتوي التعليق تجريحاً أو شتائم أو قدحاً وذماً.
- أن لا يتضمن التعليق أية إشارات عنصرية أو طائفية أو حزبية.
- أن لا يتعدى عدد الكلمات 200 كلمة كحد أقصى.
- أن لا يحتوي التعليق على أية مادة ترويجية أو دعائية.