"قانون العائلة" آخر معاقل رجال الدين

  • ديما أحمد صالح

كنت اتصفح الستوريز على الانستغرام عندما لفتتني صورة من عريضة موقعة باسم عائلة معروفة ضد اتفاقية "سيداو" نشرها صديق لي ينتمي إلى هذه العائلة، لنسيمه "الرجل العصري بسلامتو".  وهو شاب عصري،

حليق، يرتدي أخر صيحات الموضة الغربية، من متابعي البرامج الغربية. يستخدم موبايل وكمبيوتر ابو تفاحة مقروطة وانترنت من صناعة الفرنجة ويلوك جملة "اتس اوكي" على الرايح والجاي.

 

أرسلت له مسج استهجان: ما توقعتها منك يا لرجل العصري بسلامتو!

"وبما أنه في جعبتي الكثير من الكلام ولا أريد أن أتجاوز عدد الكلمات التي فرضها الناشر، قررت اختصار اسم الشاب إلى هو"

هو: ولة بدك الحكومة تعترف باتفاقية غربية ويقضوها البنات إجهاض!

أنا: ليش مخك راح دغري للإجهاض؟ ولنفترض انو وحدة حملت من غير زواج، بشو اعتراضك رح يفيد لما تخلف الولد وما يعترف فيه المجتمع.

هو: احنا بلد مسلم ومش لازم نتبنى القوانين المدنية الغربية

أنا: بس معلش انو كل قوانين الدولة مصدرها مدني إلا قانون العائلة

هو: لازم يكون مبني على الشريعة عشان نحافظ على تماسك الأسرة المسلمة بعدين اتفاقية سيداو بتشجع الزوجات يقاسمونا بفلوسنا

أنا: بتقصد قانون الأموال المشتركة؟ يعني الوحدة تخلف، تربي، تخدم جوا وبرا البيت وبالاخير بس تتطلق يرميهاالزلمة بالشارع وبتصير تركض ورا بالمحاكم عشان تحصل على نفقة ما بتجيب  حق علكة للولاد.

هو: القرآن نصف المرأة

أنا: المطلوب إعادة قراءة القرآن بشكل يناسب هالعصر ولة عاجبك لما تكون الوحدة متعلمة ومحققة ذاتها وإذا بدها تتزوج فلازم ابوها يكون الولي وإذا فش أب أو عم أو خال ساعتها أخوها ابو مخطة اللي عمروا 18 سنة بقدر يكون الولي عليها

هو: بدك يتجوزوا على مزاجهم

أنا: ليش مخك راح لهالفرضية! فكرك ليش الأنظمة تجاهلت قانون العائلة؟

هو: لحماية المجتمع

أنا: غلط.الأنظمة بمرحلة فصل الدين عن الدولة فضلت تقديم قانون العائلة ككبش فداء عشان ما تخلي رجال الدين يحسوا انهم فقدوا سلطتهم. بتعرف انو قانون العائلة الفلسطيني مهجن؟

هو: كيف و القرآن لم يُحرف

أنا: قانون العائلة جاي من مصادر متنوعة. محاكم الضفة الغربية بطبق قانون الأحوال الشخصية الأردني لعام       1976 ومحاكم قطاع غزة بطبق قانون حقوق الأسرة لعام 1954. والمشرعين اللي عملوا هاي القوانين، تقول كانوا يعملوا شوبينج فاختاروا على مزاجهم من  المدارس الفقهية، شوي من المالكي شوي من الشافعي شوي من الحنبلي وخلوا الكلمة الأخيرة للمذهب الحنفي.

هو: عادي ما همي اللي فسروا القرآن

أنا: بس ذكور و فسروا على مزاجهم و سكروا باب الاجتهاد بالقرن العاشر.

هو: يعني بدك نسوان تفتح مدارس جديدة؟

أنا: لازم الجميع يشارك خاصة انو المدراس الفقهية ظهرت وبلشت تفسير القرآن بالعصر العباسي يعني ما بين 150 ل 250 سنة بعد وفاة الرسول.

هو: خلصينا من تواريخك

أنا: الشريعة الإسلامية اللي ماشيين عليها بالوقت الحالي مختلفة عن اللي اطبقت في زمن الرسول وبعد وفاته. انت بتصلي؟

هو: الجمعة

أنا: طيب شيخ طهموز لما بدك تعمل فيها الفارس المغوار اللي بدافع عن الإسلام يا ريت ما تمسكلي الدين من ذيله.

غاب الرجل العصري بسلامتو في الزحام وأكتشفت بعدها أنه خلعني بلوك.