صفحة من المعجم

  • إخلاص أبو سارة

يا أخي هالفلسطيني ما في شي بمر بحياتو هيك مرور الكرام، كل شي عندو إلو حكاية ومعنى..
بالوعي واللاوعي بصير يصنف ويحلل كل شي بشوفو وبسمعو،

وباعتقادي الموضوع بطل مجرد اعتيادية، لاء الموضوع عم بطور وبصير نوع من التغيير في الـ DNA  يعني "وراثي". عند الفلسطينية الأرقام والألوان والأحرف إلها دلالات عميقة وسياقات جوهرية...
يعني لما بتحكي (48) هالرقم أبداً ما بكون مجرد رقم عادي، بالنسبة للفلسطينية هو رقم منحوس أكتر من رقم (13) بـ 13 ألف مرة .. المشكلة ما بتوقف عندو ع المسطرة التاريخية لأنو بعد نكبة التمنية وأربعين أجت نكسة السبعة وستين، الفكرة مش بس بالأرقام عزيزي القارئ، المأساة الحقيقية بالنسبة للفلسطيني أنو لما يفكر شو صار بهالسنتين بيتذكر كيف ضاعت القدس وحيفا والمجدل، بتذكر أرض البرتقال الحزين و البحر... البحر! قديش بدي أوقف عند هالكلمة ؟ "البحر كمظهر من المظاهر التضاريسية "، لما تحكي هالكلمة بكل العالم بحس الإنسان بالحرية والانتعاش، بس الفلسطيني البحر بيعنيلو الحسرة والمرار والحلم لبعيد، بتعرف شو، قد ما في ملح بهالبحر ما بيجي قد دموع الفلسطينية يلي انسكبت طول هالسنيين.
القاموس الفلسطيني مش عادي بالمطلق وردود الفعل النفسية عـ محتوياته غير عادية بالضرورة.. جرب مثلاً احكي قدام الفلسطيني كلمة "مخيم" أو "خيمة"، ما تتوقع يجي ببالو رحلة بالجبل أو بالبرية! صدقني هالفكرة بعيدة عنو بُعد المريخ وأصلاً موضوع شديد البذخ أنو يفكر فيه، مش لأنو نكد لا سمح الله بس لأنو المخيم صار عندو جزء من الانكسار العظيم؛ يعني لازم يتذكر التشريد واللجوء وليالي الشتا تحت المطر والبرد، طبعاً هالانكسار بيمتد لبعيد،  لحتى يوصل للانقسام! بتعرف شو يعني انقسام؟؟ الموضوع ما إلو علاقة بــ بيولوجيا وكروموسومات أبداً.. هالكلمة بتعني للفلسطيني نار بتكوي، الانقسام يعني فتح وحماس وجبهة !

بدك كمان؟؟ هالقاموس يا عزيزي ما بخلص،
لأنو بهالبلد الحجر والشجر والموسيقا والألوان، وكل شي،
بيمتد إلى الما لا نهاية ...
فأطلق العنان لمخيلتك و لأرشيفك الخاص...

 


1917/ دير ياسين/ غربة/ الضفة/ 1987/ الكوفية/ مقاومة/ انتفاضة/ محمد الدرة/ حجر/ مولوتوف/ مفتاح العودة/ أوسلو/ القطاع/ المقاطعة/ أبو عمار/ أبو عبيدة/ مقليعة/ M75/ صلاح الدين/ الأقصى/ القيامة/ زيتون/ ميرمية/ مستوطنة/ مي وملح/ هوية زرقا/ نمرة خضرا/ وين الملايين/ أبو عرب/ منفى/ شارون/ الجدار/ حاجز/ قلنديا/ عطارة/ عوفر/ حرية/ مهند حلبي/ شهيد.